মুখ্য পৃষ্ঠা
06/04/25
14:25
"শেষ অনুৰোধ"
মই মৰিলে তুমি কান্দিবা ,
মোৰ চিতাত অথবা তুলসী তলত
এগচি চাকি জ্বলাবা
নিজানত উচুপি উঠিবা ,
মোৰ ফটো খন দুচকুৰ আগত
লৈ তুমি ক'বা-
"চোৱা , কপাল খন উকা হৈ আছে অ' মোৰ
তুমি উভতি আকৌ আহানা মোৰ
কাষলৈ |"
পূৱা-গধূলি মন্দিৰত চাকি জ্বলাই ,
মোৰ আত্মাৰ শান্তিৰ বাবে ,
প্ৰাৰ্থনা কৰিবা |
স্বামী থাকিও তুমি বিধবা হ'বা ,
আকাশত মোৰ হাঁহিৰ নিচান
বিচাৰি থাকিবা
সুখৰ কাৰেংঘৰত অভিমান কৰিবা |
নাঃ
তুমি চিঞঁৰি কান্দিবা
মোৰ মৃত্যুৰ সাক্ষী হৈ থকা ,
মাটিৰ টিলাটোৰ কাষত তুমি বহিবা |
ওঁহো
তুমি মোৰ স্মৃতিত কবিতা লিখিবা ,
চকুৰ পানী ঢ়াকি
মোৰ আধালিখা জীৱন ডায়েৰীৰ পৃষ্ঠাত
তুমি হাঁহিৰে প্ৰেমৰ গল্প লিখিবা |
সচাঁকৈ...... বিষ্ফুৰিত হিয়াত মমতাৰ শেষ
বিননিক প্ৰাণ দিবা |
এয়া যে অলৌকিক মোৰ সপোন প্ৰিয়া |
তুমি মাথো হাঁহি-হাঁহি ,
লাজৰ ওৰণি লৈ মোৰ পৰা আতৰি যাবা |
অষ্টাচলত দিনমনিয়ে বিদায় লোৱাৰ
পৰত ,
তুমি ৰঙীন শাড়ি খন পিন্ধি ,
চহৰৰ বুকুত উলাহত নাচিবা |
মোৰ শেষ কামনা |
ভুল নুবুজিবা প্ৰিয়া ,
মোৰ প্ৰেমৰ অনুৰুধ ৰাখিবা |
© ৰাজু কলিতা
25/11/13
